TIRANË– Ministri i Mbrojtjes Niko Peleshi ka bërë bilancin në lidhje me situatën e shkaktuar nga moti i keq që ka përfshirë vendin tashmë prej tre ditësh. Në një deklaratë për mediat Peleshi bën me dije se lumi Vjosa është pranë niveleve kritike ndërsa zona e Nënshkodrës ka shtim të përmbytjeve. Ndër të tjera ai u shpreh se orët që vijnë priten të jenë më kritike sa i përket reshjeve të shiut dhe stuhive.
Niko Peleshi: Priten reshje të dendura shiu në vend. Lumi Vjosa është pranë niveleve kritike. Ka shtim të përmbytjeve në zonat e Nënshkodrës. Shkarkimet po bëhen në mënyrë të kujdesshme nga KESH. Gjatë ditës së djeshme përmendën dhe shkëputjet e energjisë elektrike. Ka pasur disa ndërprerje në zona të Shkodrës, Kukësit, apo dhe në Korçë. Sa i përket kuotave të lumenjve, Osumi është në rënie. Në Urën e Varur, ky lum është në kuota normale. Drini në Shkodër, është në kuotë normale. Niveli i liqenit të Shkodrës është dhe gjysmë metri nga kuota kritike. Buna ka dalë nga shtrati. Në Lezhë kemi pasur disa vërshime në disa rrugë të qytetit.
