TIRANË– Xhaxhai i Alda Klosit, ish-zyrtares së lartë në shtëpinë e së cilës u vodhën 120 mijë euro ka ndërrura jetë në Shtetet e Bashkuara të Amerikës duke mos e fituar betejën me sëmundjen e rëndë. Xhaxhai I saj u bë pjesë e kronikës pas deklaratave të bëra nga Alda Klosi në prokurori e polici se paratë e vjedhura në shtëpinë e saj i kishte mbledhur për të kontribuar në kurimin e tij. Ajo shtonte se kishte shkuar dhe vetë në SHBA.
Lekët i kam të gjitha të deklaruara. Lekët i kisha për një rast fatkeqësie, për xhaxhin tim që e kam me tumor. Ndodhet në SHBA. I kemi gjetur, mbledhur lekët për këtë rast. Unë kam qenë në Amerikë. Denoncimin e bëra vetë.’, ka thënë Klosi kur iu zbuluan paratë.
A2 CNN’ shkruan se familja e Çikës ish-kirurg dentar, nuk ka pasur dijeni lidhur me deklarimet e Klosit në polici dhe prokurori, ndërsa kanë mohuar përfshirjen e tyre në këtë histori. Prokurorja Mirela Zavalani tha për ‘A2 CNN’ se dosja vijon të jetë në hetim dhe se prokuroria ende nuk ka dalë në një konkluzion sa u përket deklarimeve të ish-zyrtares. Pas njoftimit të policisë nga vajza e saj se shtëpia e marrë me qira ishte vjedhur, Alda Klosi tha në polici se kishin marrë 120 mijë euro dhe disa sende me vlerë.
Vjedhja në shtëpinë e ish-zyrtares së lartë Alda Klosi në “Rrugën e Kosovarëve” ndodhi disa ditë më parë. Për vjedhjen e 120 mijë eurove nga kasaforta e Klosit është arrestuar pastruesja Rozeta Dobi dhe i biri Havier Dobi të cilët kanë pranuar krimin para policisë. Por ajo që mbetet ende një mister i “pazgjidhshëm” për drejtësinë e policinë janë 400 mijë eurot e gjetura në shtëpinë e pastruese Rozeta Dobi, të cilat ishin fshehur në tubin e aspirimit. Deri më tani askush nuk u ka dalë për zot apo ti denoncojë të vjedhura. Klosi e mohon të jenë të sajat ndërsa Rozeta Dobi ende nuk ka pranuar të flasë për to. Dobi njihet si pastruesja e VIP-ave pasi është kujdesur për mirëmbajtjen e disa personaliteteve të larta të shtetit emri i të cilëve nuk është bërë ende i ditur. Të kujt janë 400 mijë eurot është pyetja që ende drejtësia nuk i është përgjigjur dhe me këto ritme që po ecin hetimet një përgjigje e shpejtë është ende shumë larg.
