TIRANË– Dy persona kanë rënë në prangat e policisë kufitare të Rinasit pasi akuzohen për vepra të ndryshme penale. Kështu në njoftimin e bërë publik për mediat policia bën me dije se është arrestuar një 45-vjeçar turk pasi ka tentuar të kalojë kufirin me dokumente të falsifikuara. Po ashtu në pranga ka rënë dhe një person i identifikuar me inicialet V.M pasi ka tentuar të kalojë një kufi një shumë prej 12 495 euro të padeklaruara.
NJOFTIMI I PLOTË:
Rinas/Policia Kufitare, kontrolle të shtuara, duke përdorur pajisjet logjistike bashkëkohore, për parandalimin dhe goditjen e krimeve ndërkufitare. Tentoi të kalonte kufirin, me dokumente të falsifikuara, arrestohet në flagrancë 1 shtetas turk. Evidentohet dhe goditet 1 rast i mosdeklarimit të të hollave në kufi. Sekuestrohen 12 495 euro, procedohet penalisht 59-vjeçari që nuk i deklaroi.
Shërbimet e Policisë Kufitare Rinas, në vijim të kontrolleve të detajuara të dokumentacionit që paraqesin shtetasit që hyjnë dhe dalin në këtë pikë të kalimit kufitar, kanë evidentuar dhe goditur një rast të tentativës për të kaluar kufirin në mënyrë të paligjshme, me dokumente false.
Në përfundim të veprimeve hetimore u arrestua në flagrancë shtetasi O. K., 45 vjeç, banues në Turqi. Gjatë kontrollit, shërbimet e Policisë i gjetën këtij shtetasi, dokumente të dyshuara të falsifikuara, me të cilat ka tentuar të kalojë kufirin, në mënyrë të paligjshme.
Gjithashtu, shërbimet e Policisë Kufitare Rinas, në vijim të kontrolleve të shtuara, kanë kaluar për kontroll të detajuar bagazhet e shtetasit V. M. Gjatë kontrollit të valixhes së këtij shtetasi janë gjetur 12 495 euro, të cilat ai nuk i kishte deklaruar, sipas përcaktimeve ligjore.
Në vijim të veprimeve u sekuestrua shuma e parave dhe u referuan materialet në prokurori, në ngarkim të shtetasit V. M., 59 vjeç, lindur dhe banues në Budva, për veprën penale “Mosdeklarimi në kufi i të hollave dhe i sendeve me vlerë”. Materialet i kaluan Prokurorisë, për veprime të mëtejshme procedurale.
