TIRANË– Është shuar në moshën 80-vjeçarje mjeku, publicisti dhe profesori i njohur Isuf Kalo. Ai vuante nga një sëmundje e rëndë, betejën me të cilën nuk e fitoi dot. Prej kohësh ai ndodhej jashtë Shqipërisë ku dhe po kurohej. Isuf Kalo do të prehet në vendlindjen e tij në Luzat, ku ai u lind në 1942 ashtu siç ishte dhe amaneti i tij.
Lajmin e ndarjes nga jeta të mjekut Isuf Kalo e ka bërë të ditur ministrja e Shëndetësisë Ogerta Manastirliu. Në një postim në Facebook shkruan se kontributi i tij në mjekësinë shqiptare është i paçmueshëm.
Kalo ka lindur në vitin 1942 në Tepelenë. Studimet i ka përfunduar në Fakultetin e Mjekësisë në Universitetin e Tiranës në vitin 1964. Prof. Kalo u specializua në disa vende evropiane për diabetologji dhe endokrinologji. Ai është një nga pionierët e këtij domeni në Shqipëri. Për disa vite ka qenë kryetar i endokrinologjisë dhe sëmundjeve metabolike në Fakultetin e Mjekësisë dhe në Spitalin Universitar të Tiranës. Ai është Doktor i Shkencave Mjekësore, Profesor i Mjekësisë dhe i nderuar me Çmimin Punëtor Shkencëtar i Dalluar i Shqipërisë. Në vitin 1985 Isuf Kalo ishte mjeku personal i Enver Hoxhës. Midis 1991 dhe 2004 ai u punësua nga Zyra Rajonale e Organizatës Botërore të Shëndetësisë për Evropën (në Kopenhagë), duke drejtuar Programin Evropian të Diabetit dhe më vonë Programin e Cilësisë së Sistemit Shëndetësor në Evropë. Ai është autor i një sërë botimesh në shtypin mjekësor të vendit të tij dhe jashtë saj, si dhe është anëtar nderi i disa komiteteve ndërkombëtare dhe shoqatave mjekësore në Evropë.
