ELBASAN– Vëllai i 52-vjeçarit Gjin Biba, i cili u gjet i vdekur ditën e sotme nga policia në tunelin e fshatit Letan në Elbasan ka bërë një deklaratë të fortë ku shprehet se vëllai i tij nuk ka vdekur se ka rënë nga lartësia siç pretendon policia por e kanë vrarë. Në një prononcim për mediat Viktor Biba tha se Gjini është gjetur rreth 200 metra gurores ku punonte. Sipas tij ai është vrarë nga disa punonjës të gurores të cilët tha se do i hidhte në gjyq. Ndër të tjera ai hodhi poshtë pretendimit se vëllai i tij ishte njeri i alkoolizuar duke thënë se vetëm e tepronte me pijen.
Viktor Biba: Na kanë thënë tek puna se kishte ardhur në shtëpi por kur shkuam në shtëpi nuk e gjetëm. Është gjetur 200 metra larg vendit të punës, i masakruar. Këtë e kanë bërë vetëm punonjësit që kanë punuar me të të cilët do t’i hedh në gjyq. Këtu është bërë një krim sepse ai është masakruar.
52-vjeçari Gjin Biba ishte denoncuar i zhdukur nga familjarët dy ditë më parë. Ditën e sotme ai është gjetur i vdekur në afërsi të tunelit të Letanit në Elbasan. Ai jetonte në Tiranë por punonte në Elbasan. Në njoftimin e saj zyrtar Policia e Elbasanit bën me dije se viktima dyshohet ka vdekur si pasojë e rënies nga lartësia, pretendime këto që hidhen poshtë nga familjarët.
NJOFTIMI I POLICISË:
Rreth orës 10:30, në fshatin Letan, në vendin e quajtur “Gurorja”, është gjetur i pajetë shtetasi Gj. B., 52 vjeç, banues në Tiranë. Paraprakisht, dyshohet se 52-vjeçari ka rënë aksidentalisht nga lartësia dhe për pasojë, ka humbur jetën.
