Gjykata e Lartë e la në qeli, Lefter Koka drejt Gjykatës Kushtetuese

Pas vendimit të Gjykatës së Lartë që e la në qeli, ish-ministri i Mjedisit Lefter Koka i arrestuar prej më shumë se një viti për aferën e inceneratorëve, do t’i drejtohet Gjykatës Kushtetuese. Burime pranë ish-ministrit, pohuan për MCN se vendimet e gjykatave që refuzuan kërkesat e Lefter Kokës, për një masë më të butë, do të jenë objekt i gjykimit në Kushtetuese.

Argumenti kryesor që do të përdorë mbrojtja në betejën e re ligjore do të jetë shkelja e një procesi të rregullt ligjor, që në thelb ka shëndetin e të pandehurit.

Kolegji Penal i Gjykatës së Lartë, pasi shqyrtoi në dhomën e këshillimit, kërkesën e të pandehurit Lefter Koka për ndryshimin e masës së arrestit, vendosi: mos pranimin e rekursit të paraqitur nga avokatët mbrojtjes.

Në dhjetor të vitit të kaluar, SPAK urdhëroi prangosjen e ish-ministrit të Mjedisit për dosjen e inceneratorit në Elbasan. Por hetimet çuan prokurorët në konkluzionin se Koka kishte përgjegjësi penale edhe në procedurat e inceneratorit të Fierit, duke kërkuar në gjykatë vendosje të një tjetër masë sigurie ‘arrest me burg’, me dy akuza të reja.

SPAK pretendon se Koka ka përfituar përmes ryshfetit 1.2 milionë euro për ndërtimin e inceneratorit të Fierit. Ndërsa për inceneratorin e Elbasanit, Koka akuzohet se ka marrë ryshfet 3.7 milionë euro për ndërtimin e tij.

Avokatët pretendojnë se Lefter Koka është i sëmurë dhe prej javësh ai është mbajtur në spitalin e burgut për shkak të problemeve me zemrën. Ish-ministri mbahet i izoluar në shërbimin e posaçëm në burgun e Durrësit.

Prokurorët kanë përfunduar hetimet për dy ish-zyrtarët e vetëm në masë arresti, pra bëhet fjalë edhe për ish-deputetin socialist Alqi Bllako i cili vetëm dy ditë më parë u la në arrest shtëpie nga GJKKO.

Dosja me dy ish zyrtarët e arrestuar për aferën e Inceneratorëve, pritet të shkojë për shqyrtim në gjykatë e posaçme anti-korrupsion brenda këtij muaji.