TIRANË– Detaje të reja kanë dalë në dritë në lidhje me atentatin e dështuar ndaj ish-prokurorit Arjan Ndoja, tre vite më parë. Raportohet se urdhrat e arrestit për këta persona janë firmosur në muajin nëntor dhe dhjetor të vitit 2022 dhe janë mbajtur sekret, pasi prokurorët sipas informacioneve që kishin rezultonte se eksponentët e kësaj ngjarjeje që janë shpallur në kërkim ishin duke diskutuar për t’u kthyer në Shqipëri.
Balkanweb shkruan se duke vlerësuar se kishte kaluar një kohë e gjatë dhe mund të kishte ngjarje të tjera kriminale, prokuroria ka vendosur që të bëjë publik aksionin dhe të arrestojë 5 personat që sot dolën për masë sigurie. Po ashtu thuhet se Ramazan Rraja, pas atentatit, është ndaluar në aeroportin e Zvicrës dhe pasi është marrë disa orë në pyetje, është lënë i lirë, ndërsa tashmë është shpallur sërish në kërkim.
Në prangat e policisë kanë rënë Bashkim Haxhija, Marsel Decka, Endrit Sinani, Genti Ndërjaku alias Kili, ky i fundit u arrestua në vilën e Ramazan Rrahjës në Fushë Krujë. Ndërjaku dhe Juljan Pjetri kanë konsumuar elementët e veprave penale të “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal” dhe “Kryerja e veprave penale nga grupi i strukturuar kriminal”, të parashikuar nga nenet 80, 333/a/2 dhe 334 të Kodit Penal, në dëm të shtetasve A.N dhe A.L, G.M dhe A.M, sipas episodeve respektive (episod i konsumuar pas ngjarjes së datës 01.11.2019). Në kërkim është shpallur Ramazan Rraja, Plarent Dervishaj dhe Julian Meçaj.
