Tahiri i drejtohet sot Gjykatës në kërkim të uljes së dënimit

Tahiri i drejtohet sërish Gjykatës, kërkon njohje të kohës së paraburgimit

Ish-Ministri i brendshëm, Saimir Tahiri i cili po vuan dënimin e formës së prerë në burgun e Kosovës të Lushnjës, pasi është dënuar për shpërdorim detyre, do t’i rikthehet sërish dyerve të Gjykatës.

Burime bëjnë me dije se Tahiri i ka dërguar sërish një kërkesë Gjykatës për njohjen e kohës së paraburgimit.

Të njëjtat burime konfirmojnë se ditën e sotme Gjykata e Shkalles së Parë Elbasan do të mblidhet në orën 10:00 për të shqyrtuar kërkesën, ndërkohë që ka kërkuar që të jetë prezentë edhe Prokuroria e Elbasanit, e cila do të përfaqësohet nga Prokurori i Ekzekutimeve penale.

Gjyqtarja për kërkesën e Sajmir Tahirit është Pajtime Fetahu.

GJKKO më 4 shkurt dënoi ish-ministrin e Brendshëm, me tre vite e katër muaj burgim, për veprën penale “Shpërdorim të Detyrës”.

Fillimisht, Tahiri u dënua me pesë vite burgim, por, për shkak të gjykimit të shkurtuar, do të vuajë tre vite e katër muaj burg.