TIRANË– Deputetja e Partisë Socialiste Klodiana Spahiu ka konfirmuar kandidatin e të majtëve për bashkinë e Durrësit. Në një intervistë për “Euronews Albania” Spahiu tha se tashmë është e konfirmuar që kryetarja aktuale Emiriana Sako do të jetë e besuara e socialistëve për Durrësin. Deputetja tha se tashmë Sako ka nisur fushatën dhe takimet me qytetarët.
PJESË NGA INTERVISTA:
Gazetarja Esmeralda Mulaj: Kur do ta kemi kandidatin për Durrësin?
Deputetja Klodiana Spahiu: Unë e di që ne e kemi kandidatin për Durrësin. Ne e kemi filluar punën prej kohësh.
Esmeralda Mulaj: Kush është kandidati?
Klodiana Spahiu: Kandidati është kryetarja aktuale e Bashkisë së Durrësit, zonja Emiriana Sako.
Esmeralda Mulaj: Është e konfirmuar?
Klodiana Spahiu: Patjetër që është e konfirmuar! Për hir të së vërtetës ne na duket sikur kemi qenë tërë kohës në fushatë në zgjedhje pasi nuk kanë kaluar as 11 muaj nga fushata e kaluar e zgjedhjeve të marsit. Kështu që PS ka qenë e angazhuar jo vetëm për zgjedhjet e marsit, por gjatë gjithë kohës kemi qenë në kontakt me qytetarët. E vlerësoj shumë dhe kandidaturën, pasi krytarja gjatë gjithë kësaj periudhe ka qenë shumë aktive në takimet me qytetarët.
