KORÇË– Një 61-vjeçar i identifikuar si Artur Kaçani ka rënë në prangat e policisë së Korçës pasi u kap në flagrancë duke transportuar 6 emigrantë të paligjshëm. Arrestimi i tij u bë në Bilisht. Kur efektivët ndaluan mjetin e tij tip “Opel” u konstatuan dhe emigrantët, të cilëve u ishte premtuar kalimi drejt vendeve të Bashkimit Europian. Po ashtu pas testit të alkoolit ai rezultoi dhe në gjendje të dehur, duke rënduar edhe më tepër situatën e tij me ligjin.
NJOFTIMI I POLICISË:
DVP Korçë/Finalizohet operacioni policor i koduar “Midnight 5”. Transportonte kundrejt fitimit, 6 emigrantë të paligjshëm, me një automjet që e drejtonte në gjendje të dehur, arrestohet në flagrancë 61-vjeçari.
Specialistët për Hetimin e Trafiqeve të Paligjshme dhe Narkotikëve të DVP Korçë, në bashkëpunim me Drejtorinë Vendore të Kufirit dhe Migracionit Korçë dhe shërbimet e Forcës së Posaçme “Shqiponjat”, në vijim të punës për goditjen e veprimtarisë kriminale të dhënies ndihmë shtetasve të huaj, kundrejt përfitimit, për kalim të paligjshëm të kufirit, finalizuan operacionin policor të koduar “Midnight 5”.
Si rezultat i operacionit u bë kapja dhe arrestimi në flagrancë i shtetasit A. K., 61 vjeç, banues në Bilisht, Devoll, për veprat penale “Ndihma për kalim të paligjshëm të kufijve” dhe “Drejtimi i automjeteve në mënyrë të parregullt”.
Shërbimet e Policisë, në bazë të informacioneve të siguruara përmes inteligjencës informative, për një shtetas që do të transportonte emigrantë të paligjshëm, organizuan veprimet dhe bënë të mundur lokalizimin dhe më pas ndalimin e automjetit tip “Opel” me drejtues shtetasin A. K., në qytetin e Bilishtit, Devoll. Gjatë kontrollit të ushtruar në automjet, u gjetën 6 emigrantë të paligjshëm të cilët 61-vjeçari do t’i transportonte drejt vendeve të BE-së, kundrejt fitimit. Pas kryerjes së testit të alkoolit rezultoi se shtetasi A. K. e drejtonte automjetin, në gjendje të dehur.
Materialet i kaluan Prokurorisë pranë Gjykatës së Rrethit Gjyqësor Korçë, për veprime të mëtejshme.”
