TIRANË– Gjykata e Apelit e Tiranës ka lënë në burg pastruesen Rozeta Dobi, e cila akuzohet se ka vjedhur 120 mijë euro në shtëpinë e ish-zyrtares së lartë Alda Klosi. Në shtëpinë e saj u gjetën dhe 400 mijë euro të tjera që nuk dihet se të kujt janë. Në burg është lënë dhe i biri Havier Dobi.
Mwsohet se Prokuroria e Tiranës kërkoi nga Policia Shkencore të bëjë verifikimet për kartëmonedhat dhe po ashtu të kontrollohen disa banesa. Pritet ende përgjigje nga bankat e nivelit të dytë, për të parë nëse e dyshuara dhe i biri kanë llogari bankare dhe sa është shuma në këto llogari. Informacion është kërkuar edhe në Kadastër, për llogaritë bankare dhe pasuritë që zotëron Alda Klosi, por edhe zyrtarë të tjerë në shtëpitë e të cilëve punonte si pastruese Dobi.
