VLORË– “Big Brother” i Policisë është zhvendosur në Vlorë. Mësohet se blutë e qytetit bregdetar kanë nisur kërkimin për të zbuluar kamerat e vendosura nga grupet kriminale në rrugët e qytetit. Kontrolle po ashtu janë bërë dhe në biznese kamerat e të cilave policia dyshon se mund të përdoren nga grupet kriminale. Raportohet se aksioni ka nisur që në orët e para të mëngjesit dhe vijon ende. Policia e Vlorës nuk ka dalë akoma me njoftim zyrtar.
Ky aksion nga blutë e Vlorës vjen pak ditë pas zbulimit të 38 kamerave të tjera të vendosur në rrugët e kryesore të Shkodrës, të cilat përdoreshin nga grupet kriminale për të kontrolluar lëvizjet e policisë në zonë por dhe lëvizjen e kundërshtarëve. Në lidhje me këtë Policia e Shkodrës ka shoqëruar në polici pesë persona, të cilët mund të ndihmojnë në zbardhjen e emrave të atyre që fshihen vërtetë pas këtyre.
