TIRANË– Kryetari i Partisë Demokratike ka paralajmëruar protesta masive kundër qeverisë. Në një konferencë urgjente për mediat nga selia blu kryedemokrati u bëri thirrje demokratëve që të mobilizohen për atë që ai e quajti një beteje finale me kryeministrin Edi Rama. Sipas tij askush dhe asgjë nuk do të mund ta mbajë në pushtet qeverinë.
Sali Berisha: Demokratet dhe demokratë, janë momentet më solemne, më kritike, më të rëndësishme të jetës tuaj politike. E ardhmja e PD-së, e demokracisë shqiptare do të përcaktohet nga suksesi i betejës kundër kësaj kalbësire të pashembullt, që angazhoi në shkelmim më të paimagjinueshëm, flagrant, parimi dhe interesi të Shqipërisë dhe shqiptarëve, agjenturën, mafian ruse për shkatërrimin e pluralizmit dhe demokracisë në Shqipëri. Ne pra hymë tani në finale. Çdo luftë ka betejën finale dhe kjo që do të nisim është beteja finale në të cilën ju siguroj se ne do të fitojmë. Edhe njëherë i kërkoj Edi Ramës në mënyrë të prerë; largohu menjëherë nga pushteti. Jep dorëheqjen se alternativë tjetër nuk ka për ty. Edhe tanket Putin të vijnë në Tiranë, nuk të mbajnë në pushtet, largohu menjëherë.
Edhe njëherë, demokratë dhe demokrate, ora është e jona, e një beteje që në do ta bëjmë me vendosmëri, guxim dhe përkushtim si asnjëherë tjetër më parë.
Faleminderit! Do kemi betejë me gjithë mjetet e mosbindjes civile. Ky ka kryer aktet më makabre dhe më të rënda. Këto janë mesazhet e mia, por jam i bindur se këto burojnë nga mendja e çdo demokrati. E panë qartë sesi një demon pushteti ka angazhuar nën petkun e FBI agjenturën ruse për shkatërrimin e forcës kryesore politike opozitare. Pjesa tjetër e PD ka të njëjtin mendim dhe natyrisht forumet e PD do të konsultohen gjërësisht, por jeni dëshmitarë se unë kam shpallur Edi Ramën armik të ekzistencës së PD, apo nuk është kështu? Kam paralajmëruar se shqiptarët nuk mund të votojnë me një armik të votës së tyre. Kjo është beteja finale, unë i them ta japë (dorëheqjen), por Shqipëria nuk do të ketë më paq. Ka përdorur paratë, shërbimet, ka kontraktuar njëshin e kundërzbulimit të FBI për t’i futur thikën PD dhe për ta nxjerrë nga skena politike. PD do i japë reston, çdo demokrat është para aleternativës të ekzistencës apo jo të PD, të mbrojtjes së saj me çdo çmim. Natyrisht do mblidhen forumet, do takohen aleatët, por Shqipëria nis betejën finale kundër këtij armiku.
