TIRANË– Kryetari i Partisë Demokratike është rikthyer sërish tek akuzat për financimin rus në PD. I pyetur nga gazetarët në konferencën e përjavshme me mediat se nëse nga institucionet amerikane rezulton që çështja për të cilën akuzohet Lulzim Basha, është rezultat i këtij lobimi (të agjentit të FBI-së), a do i kërkote ndjesë ish-kreut të demokratëve ai tha se është nga të parët që ka kundërshtruar këtë çështje. Por lideri demokrat u shpreh se i ka kërkuar Lulzim Bashës që të bëjë publik burimin e parave ose përndryshe ngelet varianti tjetër.
Pyetje: Nëse nga ky hetim që kërkoni nga institucionet amerikane rezulton që çështja për të cilën akuzohet Lulzim Basha, është rezultat i këtij lobimi, a do i kërkoni ndjesë?
Sali Berisha: Nëse ka një njeri që ka mohuar dosjen ruse në mënyrën më të fuqishme dhe të përsëritur ka qenë Sali Berisha. Unë për 4 vite kam hedhur poshtë në mënyrë absolute burimin rus. Më keni dëgjuar të flas me peng-Basha, kjo është ta marrësh tjetrin peng me dosje. Basha e mohoi në mënyrë kategorike kur doli raporti, unë i kam kërkuar që të bëjë publike burimin e parave, përndryshe ngelet varianti i padiskutueshëm. Rusët para kanë shpërndarë, a ka marrë apo jo Lulzim Basha atë ta thotë ai. Raporti thotë ta marrë, Basha nuk ka reaguar.
