Nga Edon Kuqi
Operacionet e fundit të kryera nga Policia e Shtetit që konsiston në heqjen e kamerave të sigurisë të vendosura nga grupet kriminale në rrugët kryesore të qyteteve nxorri zbuluar Policinë dhe po ashtu nxorri në dritë faktin e rëndë ku ndodhet rendi dhe siguria.
Sot u vërtetua se nuk ka më dyshim se “syri magjik” i grupeve kriminale na vëzhgon të gjithëve por më së shumti Policinë, e cila për synim ka gjetjen dhe kapjen e tyre. Operacioni “Fijet”, i cili bëri sefte në Shkodër në një nga qarqet me probleme të mëdha në krimin e organizuar që ka “përgjaku” rrugët e kryeqendrës së Veriut. U shoqëruan në Polici shumë persona me precedentë penal nga familje me “zë” në trafikun e drogës dhe krimit të organizuar por ende s’ka asnjë përgjegjës para drejtësisë dhe kamerat mbeten pa zot.
Nga Shkodra “Fijet që priten” u shtrinë në Vlorë e Durrës, Korçë, Pogradec, Dibër e Gjirokastër por dhe këtu pa asnjë rezultat konkret. Mbase të gjithë e dinë se kujt i përkasin por askush nuk flet. Policia kërkon prova por ato nuk janë te kamerat që hiqen e “fijet që priten” por tek serverat, tek ndjekja e gjurmëve që duket se policisë i ka humbut “nuhatja”.
Grupet kriminale eksperimentin social të “Big Brother” e shtrinë më tej. Kontrollili i rrugëve të qyteteve i bën qytetarët të pasigurtë dhe po, e bëjnë oficerin e policisë të pambrojtur sepse krimi është një hap para. Krimi ia di lëvizjet ose siç thoshte dikur kryeministri “Ua di targat”.
Është tronditës fakti se si u montuan kamerat, ku ishte policia dhe inspektori i zonës. Sot policia ndihet e “zhveshur” nga forca që i jep ligji se efektivi ndihet i pambrojtur përballë krimit që e shikon dhe e vëzhgon, e ndjek nga pas si hije dhe nëse e ndien veten të kërcënuar e vret.
Ky operacion vjen pas mbledhjes që kryepolici Muhamet Rrumbullaku zhvilloi me drejtuesit e policisë në qarqe. Ku e mori indicien policia dhe pse nuk veproi më parë mbetet ende e paqartë. Darka e Rrumbullakut me Ramën duket se e ka vënë atë me shpatulla pas murit. Dështimi në zbulimin e fatit të të shumëkërkuarit të drejtësisë Ervis Martinaj ka bërë që kryepolici të kërkojë dhe të arrijë një arritje përballë qeverisë që në prag zgjedhjesh rrit presionin ndaj policisë por jo pagat dhe sigurinë e tyre që në syrin e “Big Brotherit” të krimit janë të “zhveshur” nga spaletat dhe forca e ligjit./Newszone
