TIRANË- Gjatë Komisionit të Sigurisë, i pyetur nga deputeti demokrat Ferdinand Xhaferri nëse e ka takuar ndonjëherë ish-zyrtarin e lartë të FBI-së Charles McGonigal, ministri i Mbrojtjes Niko Peleshi ka treguar se ai nuk është takuar asnjëherë me McGonigal, ndërsa për drejtorin e Policisë u shpreh se nuk ka dijeni nëse janë takuar apo jo.
Xhaferri: E keni takuar McGonigal ju apo drejtori i policisë?
Peleshi: Do përgjigjem se po nuk u përgjigja do duket sikur kemi ndonjë gjë për të fshehur.
Xhaferri: Kur vjen një zyrtar i lartë i FBI takon kreun e SHISH, drejtorin e Policisë, kreun e SPAK, ai nuk takon vetëm kryeministrin, prandaj ju pyeta.
Peleshi: Së pari ju mund të dilni se nuk e përcaktoj unë dot hapësirën se ku duhet të diskutoni ju. Mund të bëni pyetje jashtë temës. Unë kam ardhur si ministri i Mbrojtjes ndërsa drejtori i Agjencisë i Mbrojtjes Civile ka ardhur si i tillë, jo si ish funksionar. Pyetja juaj ishte e drejtpërdrejtë. Jo nuk e kam takuar, nuk e di drejtori. Por edhe po ta kisha takuar unë personalisht nuk besoj se bën lajm. Ne kur takojmë dikë nuk mund të shtiem fall dhe të parashikojmë që nuk do kenë shkelje apo akuzë nga vendet e tyre. Kjo nuk është pyetje. Unë nuk merrem e spekulime. Edhe po ta kisha takuar nuk do ishte ndonjë mëkat.
