TIRANË– Kompania ajrore “Air Albania” ka rënë këtë të martë pre e një sulmi kibernetik. Raportohet se sulmi ndaj kompanisë ka nisur një ditë më parë dhe është i llojit ‘Data breach’, cënim i të dhënave me ‘ransomware’, i realizuar përmes Lockbit. Po ashtiu bëhet me dije se grupi i hakerave i kanë vendosur një “ultimatum” kompanisë për të paguar një shumë të konsiderueshme parash pasi përndryshe të dhënat që mbahen “peng” do të publikohen.
Shuma që grupi i hakerave “LockBit” i ka kërkuar kompanisë “Air Albania” që të paguajë nuk është bërë e ditur por dihet se afati fundit që kjo pagesë duhet të bëhet është 14 shkurti. Ndërkohë vetë kompania nuk ka bërë asnjë denoncim pranë autoriteteve për këtë sulm.
Ky sulm vjen pas një serie sulmesh kibernetike të kryera ndaj kompanive privarte apo dhe institucioneve shtetërore në vendin tonë. Prej muash tashmë vendi ynë ndodhet në vijën e parë të “zjarrit” për tu mbrojtur nga sulme të tilla. Vetëm pak muaj më parë një bankë e nivelit të dytë ra pre e një sulmi kibernetik ku për pasojë u publikuan të dhëna sensitive për perosna të nivelit të lartë si gjyqtar, prokurorë, deputetë apo ministra.
