TIRANË– Kryetari i Partisë Demokratike Sali Berisha ka deklaruar se ish-agjenti i FBI-së Charles McGonigal ka darkuar me kreun e grupit parlamentar të Partisë Socialiste Taulant Balla. Gjatë fjalës së tij para nisjes së mbledhjes së grupit të PD Berisha u shpreh se po ashtu ish-agjenti ka darkuar dhe me gjykatës e prokurorë dhe shkonte ku ti thoshte kryeministri Edi Rama.
Sali Berisha: Kjo aferë është një aferë e tmerrshme për të cilën normalisht duhet të fliste drejtësia, por ajo është nën kontrollin e plotë të partisë së krimit, drejtësia është këtu nën kthetrat e Edi Ramës. Dje, deputeti Bardhi dërgoi padi. Përgjigja ishte zhvejkiane: na sill aktpadinë. Nuk mjaftojnë për SKAP-in e partisë e gjithë kjo mori e pafundme e të dhënave të shtypit botëror dhe shqiptar, por duhet të gjejë Gaz Bardhi aktpadinë, që ta lexojë SKAP-i i partisë. Drejtësia është pjesë e kësaj dosje, pasi McGonigal drekonte dhe darkonte jo vetëm me politikanë të inkriminuar si Taulant Balla, por edhe me gjykatës, prokurorë, merrej edhe me veting, ku të dëshironte Edi Rama.
