VLORË– Një aksident është regjistruar këtë enjte në vendin e quajtur “Shtëpia e Oficerëve” në Vlorë. Raportohet se një 53-vjeçar i identifikuar me inicialet A.S ka përplasur me makinën e tij tip “Opel” një 11-vjeçar dhe më pas ka tentuar të largohet nga vendi i ngjarjes. Por arratia e tij nuk ka zgjatur pasi është vënë menjëherë në pranga nga blutë e Vlorës. Mësohet se i mituri është dërguar menjëherë në spitalin e Vlorës dhe pasi ka marrë ndihmën e nevojshme ka dalë prej andej. Grupi hetimor i mbërritur në vendin e ngjarjes po punon për zbardhjen e plotë të shkaqeve të aksidentit.
NJOFTIMI I POLICISË:
Aksidentoi një të mitur, nuk i dha ndihmën e parë dhe tentoi të largohej nga vendi i aksidentit, Policia e Vlorës ndalon dhe shoqëron në komisariat, drejtuesin e automjetit. Rreth orës 13:45, në afërsi të vendit të quajtur “Shtëpia e Oficerëve”, shtetasi A. S., 53 vjeç, duke drejtuar automjetin tip “Opel”, ka aksidentuar një shtetas 11 vjeç, i cili po lëvizte me biçikletë. Pas aksidentit, drejtuesi i automjetit ka tentuar të largohet nga vendi i ngjarjes, por falë reagimit të menjehershëm është ndaluar nga shërbimet e Policisë së Vlorës dhe është shoqëruar në ambientet e Komisariatit të Policisë Vlorë, për veprime të mëtejshme procedurale. 11-vjeçari pasi mori ndihmën e parë mjekësore, doli nga spitali. Në vendngjarje ndodhet grupi hetimor, i cili po kryen veprimet e mëtejshme për sqarimin e rrethanave të aksidentit.
