TIRANË– Profesionistët e IT-së dhe disa profesionistë të veçantë në administratën publike do të kenë paga konkurrente me tregun, mbase edhe me të larta se ato, deklaroi ministrja e Financave dhe Ekonomisë Delina Ibrahimaj.
Këto vendime të cilat do të miratohen brenda këtij muaji, vijnë si nevojë e nxitur kryesisht nga sulmet kibernetike ndaj sistemeve shtetërore në vend vitin e kaluar.
“Në mbledhjen e Këshillit të Ministrave ne diskutuam për nivelin e pagave dhe profesionistet që do të përfshihen ne administratën publike.
Në korrik Shqipëria ka qenë subjekt i krimit kibernetik, i cili ka vënë në sprovë sistemet tona.
Dhe ne tashmë po punojmë për të pasur mundësinë që të kemi një ekip të kualifikuar IT-sh, me qëllim që qeveria të jetë një punëdhënës i cili është konkurrent me tregun, në të cilin sektori i IT-së të ketë paga të krahasueshme me tregun, mbase edhe më të larta se ato. Pasi sistemet janë baza e mirëqeverisjes dhe sisteme të forta do të thotë siguri për të gjithë.
Ne kemi punuar intensivisht gjatë muajit janar me qëllim jo vetëm për finalizimin e strukturave për profesionistët e IT-së në gjithë sektorin shtetëror por edhe për disa profesionistë të veçantë, të cilët në fakt kanë paga më të ulta se sa pagat në treg, si sektor brenda ministrive të cilët do të kenë paga konkurrente me tregun.
Të gjitha këto vendime do të miratohen brenda muajit shkurt”, deklaroi ministrja.
Bastet online, ministrja: Nëpërmjet ligjit do ta mbrojmë këtë proces nga informaliteti
Ministrja u pyet edhe në lidhje me bastet online. Ibrahimaj deklaroi se nëpërmjet ligjit do të mbrohet procesi nga informaliteti.
“Jemi duke punuar për rishikimin ligjet të basteve sportive online. S’do ketë pikë të hapur në territor por siç ndodh në të gjitha vendet e botës do bëhen online. Njerëzit mund të luajnë online në portale të huaja. Nuk është një fakt që nuk ndodh, po mund që në bazë ligjit ta rregullojmë këtë proces dhe ta mbrojmë nga infromaliteti”./Monitor
