TIRANË– Është zbardhur aksidenti i rëndë i ndodhur mbrëmjen e djeshme rreth 23:30 në zonën e Fredkut në Tiranë ku për pasojë humbi jetën Enjo Saliaj 20 vjeç. Policia bën me dije se Enjo Saliaj ka qenë duke lëvizur me motor elektrik në momemtin që është përplasur për vdekje nga 19-vjeçari i identifikuar si Sildi Krashi.
Krashi në momentin e aksidentit nuk po udhëtonte në makinën e tij por të një personi tjetër të identifikuar me inicialet F.A. Sipas bluve të Tiranës 19-vjeçari nuk ka rezultuar i dehur apo nën efektin e lëndëve narkotike në momemtin që ndodhi aksidenti. Pas ngjarjes Krashi është larguar me shpejtësi ndërsa Saliaj është dërguar menjëherë në spital por ka humbur jetën në duart e bluzave të bardha.
NJOFTIMI I POLICISË:
Tiranë/Zbardhen rrethanat e aksidentit me pasojë vdekjen e 18-vjeçarit, që ndodhi mbrëmjen e djeshme, te Fresku. Arrestohet në flagrancë drejtuesi i automjetit që shkaktoi aksidentin.
Në vijim të punës për zbardhjen e rrethanave të aksidentit të ndodhur rreth orës 23:30 të mbrëmjes së djeshme, te Fresku, ku si pasojë e përplasjes së një automjeti me një motor elektrik, mbeti i dëmtuar shtetasi E. S., 18 vjeç (drejtuesi i motorit elektrik), i cili më pas humbi jetën në spital, specialistët e Komisariatit Rajonal të Policisë Rrugore Tiranë kanë kryer veprime hetimore për vënien përpara përgjegjësisë ligjore të drejtuesit të automjetit të përfshirë në këtë aksident.
Nga veprimet hetimore ka rezultuar se në kohën që ka ndodhur aksidenti, automjeti nuk drejtohej nga pronari i tij, shtetasi F. A., por drejtohej nga shtetasi S. K., 19 vjeç, banues në Tiranë.
Nga verfikimet ka rezultuar se shtetasi S. K. ishte i pajisur me lejen përkatëse të drejtimit dhe nuk ka qenë nën efektin e alkoolit në kohën që është përfshirë në aksident.
Automjeti dhe motori elektrik u sekuestruan në cilësinë e provës materiale. Në përfundim të veprimeve, shtetasi S. K., 19 vjeç, banues në Tiranë, u arrestua në flagrancë dhe materialet i kaluan Prokurorisë, për veprime të mëtejshme.
