TIRANË– Nënkryetari i Partisë Demokratike Luçiano Boçi dhe deputetja Albana Vokshi kanë dorëzuar këtë të premte në Kuvend kërkesën për ngritjen e Komisionit Hetimor për çështjen e ish-agjentit të FBI-së, Charles Mcgonigal. Kërkesë e firmosur nga 45 deputetë mes tyre dhe Gazment Bardhi.
Luçiano Boçi: Kemi firmosur 45 deputetë për të ngritur komisionin hetimor që të nxjerrim Ramën nga vrima e kamares. Jo vetëm komisioni do e nxjerr nga kamaria, por dhe protesta e 11 shkurtit. Rregullorja e përcakton qartë se kur ¼ e deputetëve kërkojnë ngritjen e komisionit, është detyrim që të ngrihet. Rama ka harxhuar taksat e shqiptarëve. S’do shpëtojë kësaj radhe. Ai do vijë në Komision Hetimor si ‘çeço’ dhe do përgjigjet. Ky komision do marrë detajet dhe do kërkojë të gjitha takimet e Ramës dhe skandalin e tij për të korruptuar institucionet e qeverisë amerikane, me qëllim goditjen e sistemit të pluralizimit në Shqipëri, dhe opozitës. Gjithçka do kthehet në bumerang.
Duket se kjo kërkesë ka sjellë një “bashkim” mes demokratëve pasi kanë firmosur dhe kritikë të kreut të PD Sali Berisha si Jorida Tabaku dhe pse firma e Enkelejd Alibeajt mungon. Pyetjes së gazetarëve në lidhje me firmën e Bardhit se a është ky një sinjal për bashkim Boçi tha se ky është një sinjal mirëpo u shpreh se ka nevojë që brenda PD-së të ketë qëllime të njëjta.
Luçiano Boçi: Sigurisht që po. Duam që raste të tilla të bashkëpunimit të jenë në vijimësi, na duhen edhe qëllime të njëjta.
