TIRANË– Kryetari i Partisë Demokratike Sali Berisha ka folur për herë të parë në lidhje me negociatat që po zhvillohen me grupin Alibeaj në lidhje me zgjedhjet vendore të 14 majit. Lajmin për herë të parë e bëri të ditur deputeti Saimir Korreshi, i cili gjatë një interviste tha se deputeti Gazment Bardhi i ka dërguar një letër kryedemokratit Sali Berisha ku i bën thirrje për negocim për daljen me kandidatë të përbashkët në zgjedhjet e 14 majit. Kreu i selisë blu gjatë konferencës së përjavshme me gazetarët tha se është i gatshëm për bashkëpunim.
Pyetje: Në media deputeti Saimir Korreshi ka deklaruar që Gazment Bardhi iu është drejtuar me një shkresë ku kërkon bashkëpunim për zgjedhjet e 14 majit, është e vërtetë dhe a jeni përgjigjur?
Sali Berisha: Ne jemi të hapur të bisedojmë të bashkëpunojmë me të gjithë demokratët. Kam theksuar se një dyshe është në kontroll të plotë të Edi Ramës dhe kjo është dyshja Ali-Basha. Ky është qendrimi im dhe shpjegimi im i kësaj. Ndaj dhe demokratët, i bashkojnë shumë më tepër gjëra se sa i ndajnë, kështu që nuk dyshoj që ecet dhe do ecet drejt bashkimit.
