LEZHË– Një ngjarje e rëndë është regjistruar mbrëmjen e djeshme në fshatin Dajç të Lezhës ku një familje ka përjetuar momente tmerri pasi një grup personash, të cilët janë paraqitur si Policia e Shtetit kanë mësyrë në banesë me forcë. Në momentin që ka ndodhur kjo në shtëpi ka qenë vetëm gruaja me dy fëmijët pasi kryefamiljari punon në Malin e Zi dhe ka ardhur menjëherë pasi është lajmëruar nga bashkëshortja për gjithçka që kishte ndodhur.
Në një prononcim për mediat kryefamiljari shprehet i tronditur pasi familja e tij është e terrorizuar. Sipas tij në fillim ata kane qenë duke shkallmuar dritaret dhe kanë kërkuar hapjen e derës. Pasi kanë hyrë brenda ata kanë bërë kontroll por nuk kanë marrë asgjë. Ai shprehet se nuk ka konflikt me askënd dhe kërkon që drejtësia të bëhjë punën e saj dhe kjo ngjarje të zbardhet.
Kryefamiljari Artan Gjinaj: Sot në orën 5 pa një çerek. Policia, kështu thanë, se nuk e dimë ende, kanë hyrë në kontroll në shtëpi pa asnjë lloj informacioni. Unë punoj në Mal të Zi. Gruaja më mori në telefon. Kanë ardhur me maska, kanë tentuar të thejnë dritaren. Pasi nusja u ka hapur derën, e kanë mbështetur për dere dhe kanë hyrë për kontroll në shtëpi. Unë vij njëherë në javë shtëpi, punoj atje si punëtor krahu, vetëm unë nga 4 pjestarët e familjes. Mbrëmë nuk kam qenë në shtëpi dhe kanë terrorizuar familjen.
Mbetet ende e paqartë nëse personat që kanë hyrë në banesë kanë qenë vërtetë policë apo bëhet fjalë për një grup që kanë kërkuar të kryejnë akte dhune ndaj kryefamiljit, i cili pohon se nuk ka asnjë konflikt me dikë dhe se bën punë të ndershme. Policia po heton në lidhje me ngjarjen por ende nuk ka asnjë deklaratë zyrtare nga blutë e Lezhës
