TIRANË– Detaje të reja kanë dalë në dritë nga arrestimi i ish-shefes së Kabinetit të ish-ministrit Arben Ahmetaj Alda Kloisi mbrëmjen e djeshme. Gjithçka është zgjidhur pasi pastruesja Rozeta Dobi ka vendosur të bashkëpunojë me drejtësinë dhe të “zgjidhë” gjuhën duke bërë që gjithë hetimet të marrin një rrjedhë tjertër. Në dëshminë e dhënë para hetuesve të Prokurorisë së Tiranës Dobi është shprehur se paratë nuk i ka vjedhur por i ka thënë Alda vetë që t’i largonte paratë nga shtëpia dhe të insekonte gtrabitje pasi donte t’ia linte fajin ish-bashkëshortit me të cilin zihej.
Në dëshminë e saj Rozeta Dobi ka treguar gjithë eksperiencën e saj të bashkëpunimit me Klosin që daton në vitin 2018. Sipas Dobit paratë i ka zbuluar kur ka qenë duke pastruar shtëpinë dhe kishte vënë re që poshtë krevatit të mbuluara me batanije ajo kishte të fshehur mijëra euro. Ndër të tjera në dosjen e siguruar nga gazetarja Klodiana Lala, Dobi thotë që i ka marrë dhe i ka sistemuar në sirtare dhe për këtë e ka vënë në dijeni.
Rozeta Dobi: Kam vendosur të bashkëpunoj me policinë. Nuk dua të mbrohem nga avokatët që më ka caktuar familja. Dua të më caktoni një avokat shteti. Kam filluar punë si pastruese në shtëpinë e Alda Klosit në vitin 2018. Shtëpinë në atë kohë e kishte te Mozaiku. Aty ka pasur dhe një shtëpi tjetër. Në vitin 2018 kam konstatuar që në krevatin e saj të mbuluar me batanije kishte lekë dhe euro, shumë të mëdha. I kam marrë dhe i kam sistemuar në sirtar dhe e kam telefonuar Aldën dhe i kam thënë që lekët i ke në sirtar. Alda Klosi kishte përveç kësaj një shtëpi në Kombinat, kishte porositur një shtëpi te Kodra e Diellit dhe kishte një shtëpi të ndërtuar në truallin e prindërve. Shpesh Alda lëvizte para, unë nuk kam prekur asgjë. Kur shkoi te apartamenti te ‘Rruga e Kosovarëve’ që u nda nga bashkëshorti, ajo më kërkoi që t’i mbaja këto para. Unë e kam marrë kasafortën, e kam çuar në shtëpinë time me makinën e djalit dhe i kam sistemuar disa nga lekët dhe bizhuteritë. Disa të tjera i kam vendosur te sirtari i dollapit tim për ti sistemuar më vonë. Makinat ia kam blerë unë djalit. Njëra ka kushtuar 3 mln lekë të vjetra. Shuma prej 25 700 eurosh që janë gjetur te komoja e krevatit janë para të punës sime. Ndërkohë shtëpinë e bëra unë rrëmujë sepse Alda donte të fajësonte për paratë dhe bizhuteritë bashkëshortin, pasi ai e kërcënonte.
Vjedhja në shtëpinë e ish-zyrtares së lartë Alda Klosi në “Rrugën e Kosovarëve” ndodhi disa javë më parë. Për vjedhjen e 120 mijë eurove nga kasaforta e Klosit është arrestuar pastruesja Rozeta Dobi dhe i biri Havier Dobi të cilët kanë pranuar krimin para policisë. Por ajo që mbetet ende një mister i “pazgjidhshëm” për drejtësinë e policinë janë 400 mijë eurot e gjetura në shtëpinë e pastruese Rozeta Dobi, të cilat ishin fshehur në tubin e aspirimit. Deri më tani askush nuk u ka dalë për zot apo ti denoncojë të vjedhura. Klosi e mohon të jenë të sajat ndërsa Rozeta Dobi ende nuk ka pranuar të flasë për to. Dobi njihet si pastruesja e VIP-ave pasi është kujdesur për mirëmbajtjen e disa personaliteteve të larta të shtetit emri i të cilëve nuk është bërë ende i ditur. Të kujt janë 400 mijë eurot është pyetja që ende drejtësia nuk i është përgjigjur dhe me këto ritme që po ecin hetimet një përgjigje e shpejtë është ende shumë larg.
