TIRANË– Ish-shefja e Kabinetot e ish-ministrit Arben Ahmetaj Alda Klosi, e cila u arrestua dy ditë më parë është shtruar nënspital. Raportohet se Klosi është paraqitur në Qendrën Spitalore Universitare “Nënë Tereza” pas probleme në zemër. Klosi u arrestua dy ditë më parë me urdhër të Prokurorisë së Tiranës pas dëshmisë së dhënë nga pastruesja Rozeta Dobi. Dobi akuzohet se ka vjedhur të paktën 120 mijë euro në shtëpinë e ish-zyrtares së lartë. Klosi do të përballet me tre akuza të ngritura deri më tani kundër saj: Refuzimi për deklarimin, mosdeklarimin fshehjen ose deklarimi i rremë i pasurive, interesave private të personave të zgjedhur e nëpunësve publikë ose i çdo personi tjetër që ka detyrimin ligjor për deklarim”, “Pastrim i produkteve të veprës penale ose veprimtarisë kriminale” dhe “Deklaratat e rreme përpara oficerit të policisë gjyqësore” parashikuar nga nenet 257/a, 287 e 305/b i K. Penal.
Vjedhja në shtëpinë e ish-zyrtares së lartë Alda Klosi në “Rrugën e Kosovarëve” ndodhi disa javë më parë. Për vjedhjen e 120 mijë eurove nga kasaforta e Klosit është arrestuar pastruesja Rozeta Dobi dhe i biri Havier Dobi të cilët kanë pranuar krimin para policisë. Por ajo që mbetet ende një mister i “pazgjidhshëm” për drejtësinë e policinë janë 400 mijë eurot e gjetura në shtëpinë e pastruese Rozeta Dobi, të cilat ishin fshehur në tubin e aspirimit. Deri më tani askush nuk u ka dalë për zot apo ti denoncojë të vjedhura. Klosi e mohon të jenë të sajat ndërsa Rozeta Dobi ende nuk ka pranuar të flasë për to. Dobi njihet si pastruesja e VIP-ave pasi është kujdesur për mirëmbajtjen e disa personaliteteve të larta të shtetit emri i të cilëve nuk është bërë ende i ditur. Të kujt janë 400 mijë eurot është pyetja që ende drejtësia nuk i është përgjigjur dhe me këto ritme që po ecin hetimet një përgjigje e shpejtë është ende shumë larg.
