TIRANË– Eshtrat e 24-vjeçarit Klevis Lleshi u gjetën pasditën e kësaj të hënë në Mamurras pas dy vitesh i zhdukur pa gjurmë. I riu nga Burreli u denoncua i zhdukur dy vite më parë nga e ëma, e cila pasi kishte humbur kontaktet me të birin e alarmoi Policinë për gjetjen e tij. Ajo i druhej faktit se i biri mund të kishte të njëjtin fat si babai i tij, xhaxhai apo kushëriri. Por si nisi saga e vrasjeve në familjen Lleshi?!
Gjithçka nisi në Mbretërinë e Bashkuar në vitin 2012. Vrasja e Agim Hoxhës ishte pikënisja e hakmerrjes që nuk u ndal. Ekpertiza tregoi se i riu ishte vrarë në një vend tjetër e më pas ishte futur në makinën e tij ku dhe iu vu flaka. Për ngjarjen u akuzua miku i tij i fëmijërisë Arben Lleshi. Miqësia e fortë e nisur në lagjet e Burrelit u kris në Britani për shkak të mosmarrëveshjeve.
Sipas mediave britanike shkak për vrasjen e Hoxhës dyshohet të jenë bërë prishjet e pazareve të drogës. Arben dhe Afrim Lleshaj u arrestua nga policia dhe dolën para drejtësisë britanike. Afrimi u akuzua për çorientim të autoriteteve pasi deklaronte se në kohën që ishte vrarë Agimi, Arbeni ndodhej me të. Por presioni bëri që Arben Lleshaj të pranonte krimin e kryer, megjithëse refuzoi ta kishte djegur trupin brenda në makinë.
Lleshi është dënuar me 32 vite burg dhe në vitin 2016 u ekstradua drejt Shqipërisë për të shlyer 28 vite e mbetura. Por dënimi I dhënë nga drejtësia britanike nuk do mbyllte plagën dhe etjen e familjes Hoxha për hakmarrje dhe këtu nisi gjithçka. Viti 2013 do të shënonte viktimën e parë të një hamarrjeje të fuqishme. Xhavit Lleshit babait të të riut që u gjet i groposur sot në Shpërdhet të Mamurrasit iu bë pritë në vendin e quajtur “Pujkë”. Ai vdiq në vend.
Por kjo nuk do të ishte vrasja e vetme. Tre vite më vonë, në maj të vitit 2016 Hajredin Lleshi, vëllai i Xhavitit u vra në Burrel. Vetëm një vit më vonë një tjetër tragjedi do të prekte familjen Lleshi. Djali i Hajredinit u mor peng në qendër të Burrelit dhe fati i tij ende nuk dihet. Nga Burreli ai u dërgua në Kamëz e që aty askush nuk di më asgjë për fatin e tij.
Familja Hoxha kishte vetëm një njeri që mund të merrte hak. Ai ishte Klevisi, i cili nga një fëmijë u rrit para kohe dhe nisi ‘të thurrte” planet e tij të hakmarrjes që shumë shpejt shkuan në veshin e familjes Hoxha, e cila doli një hap para dhe dyshohet se mund të kenë kryer rrëmbimin e tij pranë Pallatit të Sportit në Burrel. Klevisi ishte vetëm 22 vjeç kur u zhduk pa gjurmë deri pasditën e kësaj të hënë që erozioni i dheut nxorri në dritë eshtrat e groposura të tij.
Raportohet se ekspertiza mjeko-ligjore ka vërtetuar se eshtrat janë të të riut. Prej dy vitesh nëna e tij nuk ka reshtuar së kërkuari drejtësi. Nëna e Klevist që prej ditës së tij të zhdukjes ka akuzuar fisin Hoxha si ekzekutorë të të birit ndërsa akuzonte shoqërinë e tij se e kishin futur në kurth duke ia njerrë “në pritë” armikut. Por ende nuk ka asnjë autor të dyshuar në lidhje me ngjarjen. Vrasjet brenda familjes Lleshi kanë mbetur pa “zot” pasi drejtësia nuk vepron pa prova. Kush e vrau Klevisn?! Vrasësit me siguri nuk do të gjenden dhe ai ashtu si babai dhe xhaxhai i tij do të treten pa ditur se kush ishte dora që qëlloi drejt tyre. /Newszone
