TIRANË– Partia Demokratike nuk ‘heq dorë’ nga çështja e ish-agjentit të FBI-së Charles McGonigal dhe lidhjet e tij me kryeministrin Edi Rama dhe favoret e pretenduara të fituara nga qeveria në sajë të kësaj marrëdhëniejeje. Kështu deputetët demokratë kanë depozituar në Kuvend kërkesën me 13 pyetje për kryeministrin Edi Rama. Kjo është hera e dytë që demokratët kërkojnë një përballeje “kokë me kokë” me kryeministrin Edi Rama në lidhje me arrestimin e ish-zyrtarit të lartë të Byrosë Kombëtare të Hetimit (FBI).
Më herët demokratët kërkuan një mocion me debat por që kreu i qeverisë zgjodhi ti “bojkonte” dhe t’ia delegonte këtë detyrë ministres së Shtetit për Marrëdhëniet me Parlamentin, Elisa Spiropali. Kërkesë që u refuzua nga demokratët dhe solli debate të forta në seancë ku opozita bllokoi dhe foltoren e Kuvendit.
