TIRANË– Një ngjarje e rëndë që për pak sa nuk përfundoi në tragjedi është regjistruar në zonën e Astirit. Çifti i bashkëshorteve Selvie dhe Sinan Kazhani për pak sa nuk humbën jetën në momentin që ashensori i pallatit të tyre sapo u hap dera ra në katin 0 në mënyrë direkte. Ata banojnë në katin e 5-të pallatit dhe shprehen se e kanë përdorur ashensorin dhe më përpara dhe nuk kanë pasur problem.
Ngjarja e rëndë është regjistruar mbrëmjen e djeshme rreth orës 19:30. Në momentin që familja ka thërritur ashensorin dhe kanë hipur brenda ashensori ka pësuar avari dhe ka rënë poshtë për në katin 0. Mësohet se 5 anëtarët e familjes nuk kanë marrë dëmtime serioze por ndërkohë lëndime ka marrë vetëm e zonja e shtëpisë Selvie Kazhani. Ajo u dërgua për të kryer ekzaminimet e nevojshme në spitalin e Traumës dhe pas vizitës është kthyer sërish në shtëpi.
Dyshohet se shkak për rënien e ashensorit është bërë pesha më shumë nga sa ishte e lejuar, pasi brenda në ashensor lejohej hyrja e vetëm 4 personave ndërkohë që përveç çiftit Sinan dhe Selvie Kazani kanë qenë edhe 3 persona të tjerë të së njëjtës familje. Administratori i pallatit është shprehur se ashensori ka qenë i kolauduar por jo i regjistruar pranë organeve përkatëse. Menjëherë pas ngjarjes ashensorit i janë vënë shiritat e verdhë nga Inspektoriati Shtetëror i Mbikëqyerjes së Tregut.
NJOFTIMI I PARË I POLICISË:
Më datë 06.02.2023, në Unazë të Re, në rrugën “Aleksandri i Madh”, ka pësuar defekt ashensori i një pallati dhe ka rënë nga kati i pestë në katin zero. Në të ndodheshin shtetasi S. K., 56 vjeç, dhe shtetasja S. K., 55 vjeçe (çift bashkëshortësh). Në ndihmë të tyre kanë vajtur shërbimet e Policisë, shërbimet e zjarrfikëses dhe të ambulancës. Si pasojë, shtetasit e lartpërmendur janë dëmtuar dhe ndodhen në spital, nën kujdesin e mjekëve. Grupi hetimor ndodhet në vendngjarje dhe po punon për sqarimin e rrethanave të ngjarjes.
NJOFTIMI I DYTË I POLICISË:
Në lidhje me informacionin paraprak të dhënë mbrëmjen e djeshme, për ngjarjen e ndodhur në rrugën “Aleksandri i Madh”, ku ashensori i një pallati ra nga kati i pestë në katin zero, ju informojmë se nga veprimet e para hetimore dyshohet se shkaku i rënies së ashensorit ka qenë tejkalimi i kapacitetit, pasi në ashensor kishin hipur 5 persona, ndërkohë që kapaciteti i lejuar ishte 2-3 persona. 2 personat e dëmtuar, pasi kanë marrë mjekimin në spital, janë larguar në banesë, ndërsa 3 të tjerët nuk kanë pësuar dëmtime. Materialet për këtë rast u referuan në Prokurorinë pranë Gjykatës së Rrethit Gjyqësor Tiranë, për vlerësim.
