TIRANË– Është vënë në prangat e policisë Marjol Aliko, drejtuesi i mjetit i cili këtë të martë aksidentoi për vdekje një këmbësore e cila për pasojë humbi jetën në spital. Viktima ka qenë duke kaluar në vijat e bardha ndërsa autori i ngjarjes, Aliko është futur me semafor të kuq dhe e ka përplasur për vdekje. Blutë e kryeqytetit kanë bërë me dije se Aliko ishte nën efektin e lëndëve narkotike.
NJOFTIMI I POLICISË:
Arrestohet drejtuesi i automjetit që aksidentoi një 75-vjeçare, e cila për shkak të dëmtimeve, ndërroi jetë në spital, ditën e djeshme. Pas testimit me aparatin AquilaScan, drejtuesi i automjetit ka rezultuar nën efektin e lëndëve narkotike. Specialistët e Qarkullimit Rrugor kanë arrestuar në flagrancë shtetasin M. A., 23 vjeç, banues në Tiranë, pasi ditën e djeshme, rreth orës 16:00, duke drejtuar automjetin, në bulevardin “Zhan D’Ark”, ka aksidentuar shtetasen D. K., 75 vjeçe, banuese në Tiranë, e cila më pas ka ndërruar jetë, në spital. Pas testimit me aparatin AquilaScan, ka rezultuar se drejtuesi i automjetit, shtetasi M. A., ishte nën efektin e lëndëve narkotike. Materialet i kaluan Prokurorisë, për veprat penale “Drejtimi i automjeteve në mënyrë të parregullt” dhe “Shkelja e rregullave të qarkullimit rrugor”.
