TIRANË– Kryetari i Partisë Demokratike Sali Berisha është ndalur sërish tek çështja e arrestimit të ish-zyrtarit të lartë të FBI-së Charles McGonigal. Kreu i PD e cilësoi kryeministrin Edi Rama si armik të Shteteve të Bashkuara të Amerikës. Deklaratën e bëri gjatë një takimi që po zhvillon në selinë blu me anëtarë të degëve 8 dhe 10 në Tiranë. Kryedemokrati u shpreh se akuzat që ai bën ndaj Ramës se është armik i SHBA-ve e vërteton fakti që kreu i qeverisë ka korruptuar Charles McGnigal për të sulmuar opozitën.
Sali Berisha: Ju përshëndes ju përzemërsisht, të gjithë anëtarët dhe anëtaret, simpatizantët e degëve tuaja të mbarë Tiranës dhe Shqipërisë. Ju falënderoj me shumë mirënjohje për punën që keni bërë dhe bëni, për suksesin e madh të protestës së 11 shkurtit, protestë e cila ka ngjallë shpresat e shqiptarëve kudo që janë, protestë e cila ka një interes të madh në mbarë botën. Afera Rama-McGonigal, është një aferë botërore, që ka tronditur në fushën e sigurisë, jo vetëm në marrëdhëniet bilaterale, por ka tronditur këtë fushë për SHBA-të, vendet e NATO, dhe vendet e lira në tërësi. Aktin që ka bërë Edi Rama, mund ta ndërmerrte vetëm një fuqi armiqësore ndaj SHBA. Vetëm një vend armik mund ti lejonte vetes, ti korruptojë njeriun më të çmuar të kundërzbulimit, vendit me përgjegjësi më kryesore për sigurinë e botës. Pra në përmasa kjo tejkalon çdo lloj imagjinate për një vend partner, vend të lirë. Secili nga ju në rast se i shtroni pyetjen vetes dhe duhet të ja shtroni, si ka mundësi që ky njeri të ja lejojë vetes një akt të tillë. Ka vetëm një përgjigje, në keqësinë e tij, Edi Rama nuk njeh asnjë kufi. Nuk ka asnjë normë, asnjë virtyt. Njeriu që haptas deklaron se është i aftë të kryejë akte që kurrë njerëzit me moral normal nuk i kryejnë, do të thotë i lejon vetes çdo lloj akti në funksion të pushtetit të vet. Kjo përbën një fatkeqësi të madhe, të jashtëzakonshme, për një komb dhe shoqëri. Kur një kryeministër i lejon vetes çdo akt dhe veprim për të ruajtur karrigen e tij, ai nuk e dorëzon pushtetin në asnjë mënyrë. Ai njeh vetëm një gjuhë, gjuhën e forcës, gjuhën e frikës dhe ai përndryshe nuk ikën.
