TIRANË– Kryeministri Edi Rama gjatë takimit me studentët ekselentë të mjekësisë u shpreh se të rinjtë nuk duhet të fokusohen vetëm tek fakultetet më të kërkuara. Dhe si shembull për këtë mori Universitetin Bujqësor diplomat e të cilit sipas kreut të qeverisë janë po aq të vlefshme se sa diplomat që merren te mjekësia.
Edi Rama: Nuk i gjykoj ata të cilët pasi bëjnë një shkollë i kanë te dera kompanitë e mëdha ndërkombëtare që i kërkojnë të bëhen pjesë e tyre, s’mund të vijojmë të përsërisim një gjë e të presim rezultat tjetër. Fatkeqësisht edhe pse kemi financuar studentët, kemi financuar ekonomitë e mëdha, shtetet e pasura. Shqipëria s’mund të financojë shërbimin shëndetësor gjerman, s’ka kuptim. Për këtë arsye, ministrja pasi ngriti një skuadër për këtë program, shtroi idenë që të ndryshojë drejtim. Jo më për ekselentët që shkojnë jashtë por për ata që studiojnë këtu. Ndërkohë që të gjitha diplomat që jep Universiteti Bujqësor sot do të jenë gjithmonë e më të vlefshme në tregun ndërkombëtar se agronomët do të jenë po kaq të vlefshëm sa janë sot mjekët. Ju e shihni çfarë problematikash të mëdha po has sot e gjithë bota me temën e ushqimit, mjedisit, burimet ujore e kështu me radhë. Kështu ne kemi hyrë në këtë program të cilin do ta fuqizojmë vit pas viti duke nisur të reduktojmë mbështetjen e përgjithshme për të gjithë njësoj dhe duke prioritizuar për ekselentët dhe për ata që shkojnë në degët prioritare. Nuk ka zgjedhje bardh e zi. Ka gjëra të cilat nuk i ofron dot Shqipëria dhe mund t’i gjesh patjetër në Gjermani. Ka edhe gjëra që nuk i gjen dot në Gjermani por i gjen në Shqipëri duke nisur nga shtëpia e prindërve dhe kostot e ulëta. Rritja e pagave sot që flasim, në sektorin privat do të vijojë të thellohet. Do të rrisim pagat edhe për sektorin publik.
Po ashtu Rama bëri të ditur se qeveria do t’u ofrojnë mundësi të rinjve që të hyjnë edhe në sektorin publik me paga më të mira.
Edi Rama: Do të rrisim pagat dhe në sektorin publik. Po bëjmë një studim për të krijuar një piramidë alternative të pagave sa i përket aftësive profesionale dhe teknike të posaçme duke filluar nga teknologjia dhe nuk mundet të jemi një vend që mund t’i realizojë ato ambicie për Shqipërinë e 2030 dhe asnjë vend si i NATO-s të gjendet në një sulm kibernetik dhe shteti të mos jetë konkurrenti i fortë në treg kur vjen puna për burimet njerëzore të teknologjisë së lartë. Ne do t’i ofrojmë të rinjve mundësinë që të hyjmë dhe në sektorin publik dhe të shërbejnë si inxhinierë të teknologjisë së lartë me paga më të mira sesa në privat. Duam të përshpejtojmë procesin e integrimit por ndër të tjera, është teknikisht të ulesh të shkruash letra të cilat po t’i vësh njëra pas tjetrës bëjnë dy herë rrugën tokë-hënë dhe hënë-tokë. Duhet të përputhim mbi 4 mijë akte nënligjore me të gjithë strukturën ligjore të BE dhe për këtë kemi nevojë për njerëz të përkushtuar, të ditur, që zotërojnë aftësi që ne nuk mund dot t’i ulim në tavolinë 12 orë në ditë siç është ajo punë nëse nuk i ofrojmë dot paga të cilat janë konkurruese me të sektorit privat. Shqipëria po hyn në një fazë tjetër në aspektin e pagave dhe shpërblimit të aftësive. Sektori privat po e kupton se për të mbajtur burimet njerëzore duhet të jetë më konkurrues në aspektin e pagave dhe më pas në të produktivitetit.
