VLORË– Një megaoperacion anti-drogë i policisë së Vlorës është zhvilluar këtë të premte duke çuar në pranga 6 persona dhe duke shpallur në kërkim pronarin e vilës ku u zbuluan mbi 500 kilogramë kanabis Lorenc Xhaferri. Vila luksoze ishte e rrethuar nga të katërta anët me kamera sigurie dhe ruhej mirë pasi ishte e rrethuar me mure të larta dhe me porta të larta po ashtu në hyrje të saj.
Dy katet e vilës ishin përshtatur për kultivimin e kanabisit. Ai ruhej dhe rritej në kushte të mira pasi ishte investuar në teknologji të lartë. Policia ka nisur procedurat për sekuestrimin edhe të një hoteli me vlerë 4-5 milionë euro në pronësi të 42-vjeçarit në zonën e Lungomares, hotel “Florence”, i cili ka dyshime se është ngritur si rezultat i aktiviteteve kriminale.
