TIRANË– Gjykata e Tiranës ka lënë në burg Marjol Alikon, i cili përplasi për vdekje një të moshuar që po kalonte tek vizat e bardha në bulevardin “Zhan D’Ark” në Tiranë. 75-vjeçarja Dituri Koprencka ndërroi jetë pak orë pasi u dërgua në spital pasi nuk i mbijetoi dot plagëve të marra si pasojë e përplasjes. Në seancën e zhvilluar ditën e sotme Aliko u ka kërkuar ndjesë familjarëve të viktimës. Para togave të zeza ai ka deklaruar se nuk ka dashur ta përplasë të moshuarën por gjithçka ka ndodhur pasi i ka rënë dielli në sy dhe në këtë moment ka humbur kontrollin e mjetit.
Sa i përket sasisë së lëndës narkotike që iu gjet në gjak në momentin e arrestimit ai u shfajsua duke thënë se nuk e kishte konsumuar ditën e aksidentit por disa ditë më parë. Avokati i 23-vjeçarit Edvis Gorishti kërkoi një masë më të lehtë sigurie nga Gjykata duke shtuar se klienti i tij kishte shprehur ndjesë për vrasjen, ndërsa edhe më parë nuk kishte dënime. Kërkesa e tij është hedhur poshtë nga trupa gjykuese.
Në momentin e arrestimit prokuroria shprehet se i riu ka qenë nën efektin e lëndëve narkotike dhe si pasojë e kësaj ka ndodhur dhe aksidenti tragjik që përfundoi me vdekjen e të moshuarës pak pasi u dërgua në duart e bluzave të bardha.
