TIRANË– Oerd Bylykbashi dhe disa deputetë të tjerë të Partisë Demokratike i janë drejtuar komisariateve 1 dhe 2 në kryeqytet ku kanë kërkuar lirimin e tre protestuesve që u shoqëruan pasi hodhën tymuese drejt Kryeministrisë. Bylykbashi u shpreh në një dalje për mediat se kërkoi lirimin protestuesve të shoqëruar, konform ligjit dhe kushtetutes.
“Erdhëm në komisariat për shoqërimet që janë bërë nga policia. Ishte një protestë madhështore që dha mesazhe të jashtëzakonshme. Ishte një protestë paqësore por e qartë se nga sot e tutje fillon revulucioni demokratik. Në këtë lëvizje është e drejta e çdo qytetari të marrë pjesë dhe të protestoj fort. Përpjekja është për të bërë totalisht themelet e demokracisë. Pluralizimin politik. Protesta e sotme është mesazhe fillimi, protestat do vazhdojnë. Sot protestuesit kanë dhënë një shembull të jashtëzakonshëm. Të gjithë qytetarët që janë shoqëruar do të lirohen sepse është e paligjshme shoqërimi i tyre. Deputetët janë të gatshëm t’i qëndrojnë pranë çdo qytetari. Ose Edi Rama do të dorëzohet para të drejtës së shqiptarëve për të votuar dhe për ta shporrur me votë ose qytetarët më pas do ta largojnë,”- tha Bylykbashi.
