KAMËZ– Dy të rinj kanë rënë në prangat e policisë së Kamzës këtë të mërkurë pasi akuzohen se shisnin drogë pranë shkollave. Xhenario Klosi, 23 vjeç dhe Amand Thaçi 28 vjeç, të dy banues në Kamëz në momentin e arrestimit kishin me vete 15 doza me lëndë të dyshuar narkotike cannabis sativa, të cilat u sekuestruan në cilësinë e provës materiale. Ndërsa, nga verifikimet e kryera ka rezultuar se Thaçi kishte thyer masën e sigurisë “Arrest në shtëpi”, të caktuar nga Gjykata e Shkallës së Parë Gjirokastër, për veprën penale “Ndihma për kalim të paligjshëm të kufijve”.
NJOFTIMI I POLICISË:
Finalizohet nga Komisariati i Policisë Nr. 5, operacioni policor i koduar “Stop”. Arrestohen në flagrancë 2 shtetas që shpërndanin doza kanabisi, në afërsi të shkollave, në Kamzë. Njëri nga të arrestuarit kishte thyer masën e sigurisë “Arrest në shtëpi”, të caktuar nga Gjykata, për një vepër tjetër penale. Sekuestrohen doza me lëndë të dyshuar narkotike cannabis sativa. Shërbimet e Komisariatit të Policisë Nr. 5, në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, bazuar dhe në informacionet e siguruara përmes inteligjencës informative, për një rast të shpërndarjes së dozave të lëndëve narkotike, kanë organizuar dhe finalizuar operacionin policor të koduar “Stop”.
Në kuadër të këtij operacioni u kapën në afërsi të dy shkollave të ndryshme në Kamzë dhe u vunë në pranga shtetasit Xh. K., 23 vjeç dhe A. Th., 28 vjeç, të dy banues në Kamzë. Nga veprimet hetimore ka rezultuar se këta shtetas shpërndanin doza të lëndës narkotike kanabis, në afërsi të shkollave, në Kamzë. Gjatë kontrollit fizik, shtetasit Xh. K. i janë gjetur 15 doza me lëndë të dyshuar narkotike cannabis sativa, të cilat u sekuestruan në cilësinë e provës materiale.
Gjithashtu, nga verifikimet e kryera ka rezultuar se shtetasi A. Th. kishte thyer masën e sigurisë “Arrest në shtëpi”, të caktuar nga Gjykata e Shkallës së Parë Gjirokastër, për veprën penale “Ndihma për kalim të paligjshëm të kufijve”. Materialet i kaluan Prokurorisë, për veprime të mëtejshme.
