TIRANË– Vijojnë debatet e forta në seancën plenare ndërkohë që opozita vijon të mbajë të bllokuar foltoren. Ministrja e Shtetit për Marrëdhëniet me Parlamentin Elisa Spiropali ka ‘shpërthyer’ ndaj deputetëve të opozitës të cilëve u është drejtuar duke thënë se përgjigjen do e marrin më datë 14 maj. Sipas saj opozita nuk e rrëzon dot nga qeveria kryeministrin Edi Rama dhe se u kanë mbetur vetëm bilbilat.
Elisa Spiropali: Nuk e kuptoj si vazhdon merret fjala për procedurë për të njëjtën çështje vazhdimisht dhe pa pushim. Ndoshta jemi në pikën e rendit të ditës ku hajduti të quan hajdut, ku vrasësi ngrihet e të quan kriminal, ku imorali ngrihet e gjykon moralin kolektiv, ku ai dhe ata që janë jashtë e s’kanë lënë gjë pa i bërë këtij vendi nga dosjet, blloqet, mielli, boja, zhvatja, ngrihen këtu e pretendojnë të na bëjnë gjyq. Populli ua ka bërë gjyqin atyre. Sa herë kanë dalë e kanë vënë fytyrën e tyre, e kanë marrë përgjigjen. Ata që janë këtu apo ata që ulërijnë në majë të kalit jashtë do e marrin përgjigjen më 14 maj se nuk e mundin dot. Kanë vetëm bilbila.
