Stadiumi “Camp Nou” do të jetë prites i derbit të sotëm mes Barcelonës dhe Manchester United, ndeshje kjo e vlefshme për fazën e eliminimit direkt të Ligës së Evropës.
Lideri i La Ligas do të synojë vetëm fitoren sot, që të ketë avantazhin në ndeshjen e kthimit ndaj gjigantit anglez.
Ndërkaq, para ndeshjes, trajneri i United, Erik Ten Hag foli për mesfushorin Frenkie de Jong, të cilin e kishte pasur nën menaxhim gjatë kohës kur dyshja ishin pjesë e Ajaxit.
Ten Hag e lavdëroi tej mase De Jongun, duke thënë se është kënaqësi që ta shohësh duke luajtur, por se skuadra e tij duhet të bëjë gjithçka që ta ndalojë atë të ketë paraqitje të mirë ndaj tyre.
“Është gjithmonë një kënaqësi që ta shohësh Frenkie de Jong, sigurisht ta shohësh duke luajtur”, tha Ten Hag për “ESPNNL”.
“Ne duhet të sigurohemi që Frenkie nuk do të luajë mirë kundër nesh! Ne duhet që ta parandalojmë këtë gjë”, shtoi më tej trajneri i United.
“Djajtë e Kuq” gjatë verës së kaluar e kërkonin me çdo kusht transferimin e De Jong, por që ky i fundit refuzoi që të largohej nga Barcelona.
