Aktorja e Hollivudit Stella Stevens, e cila luajti bashkë me Elvis Presley në filmin Girls dhe me Jerry Lewis në The Nutty Professor, ka vdekur në moshën 84-vjeçare, thonë anëtarët e familjes.
Djali i saj tha për Hollywood Reporter se ajo kishte qenë në një bujtinë për disa kohë me sëmundjen e Alzheimerit. Ajo mbahet mend edhe për rolin e saj në filmin aksion The Poseidon Adventure.
Stevens ka punuar edhe në televizion, në seriale si Murder She Wrote dhe Magnum. Mikja dhe menaxherja e saj, Maria Calabrese, tha: “Ishte një nder dhe privilegj të punoja me Stellën, e cila ishte një nga njerëzit më të mrekullueshëm dhe të talentuar“.
E lindur në Yazoo City, Mississippi, në vitin 1938 si Estelle Caro Eggleston, ajo u martua me elektricistin Noble Herman Stevens në moshën 16-vjeçare dhe lindi fëmijën e saj të parë dhe të vetëm Andrew.
Dy vjet më vonë, ajo u divorcua dhe filloi modelingun dhe aktrimin. Stevens fitoi një Golden Globe për debutimin e saj në film në vitin 1959 si një vajzë kor në “Sy One for Me”, ku luajtën gjithashtu Bing Crosby dhe Debbie Reynolds.
Tek Girls, duke luajtur përballë Presley-t në vitin 1962, Stevens tha se nuk i pëlqente skenari, por Paramount i tha asaj se ishte e detyruar kontraktualisht ta bënte atë.
Gjatë viteve 1970 dhe 1980, Stevens punoi në mënyrë të qëndrueshme në televizion, duke u shfaqur gjithashtu në Hart to Hart, The Love Boat dhe Wonder Woman, ku ajo luajti një kampione naziste në xhudo që mendonte se mund të përballej me heroinën titullare të Lynda Carter.
