KROACI- Një superjaht prej 200 milion dollarësh (163 milion £) në pronësi të Viktor Medvedchuk, një oligark dhe mik i Vladimir Putin i cili është nën sanksione, do të shitet në ankand pas sekuestrimit të tij në Kroaci në fillim të këtij viti. Qeveria ukrainase tha se një gjykatë kroate kishte vendosur që jahti Royal Romance 92.5 metra i Medvedchuk duhet t’i transferohej Agjencisë ukrainase të Rimëkëmbjes dhe Menaxhimit të Aseteve, e cila tha se do të “ruante vlerën ekonomike duke e shitur atë në ankand”.
Kjo do të ishte shitja e parë në emër të popullit të Ukrainës që kur qeveritë perëndimore vendosën kufizime në asetet e qindra oligarkëve pas pushtimit rus të Ukrainës në shkurt. Medvedchuk 68 vjeç, një politikan ukrainas pro-Kremlinit, u arrestua në Ukrainë në prill dhe iu dorëzua Rusisë në një shkëmbim të burgosurish në shtator. Ai shpesh përmendet si “princi i errët” i politikës ukrainase. “Royal Romance”, i cili është ndërtuar nga kontraktori holandez i superjahteve “Feadship” në vitin 2005, është i përbërë nga kabina për 14 të ftuar dhe një hapësirë të madhe, ku përfshihet një pishinë 4 metra e gjerë.
