KORÇË- Një person është vënë në prangat e bluve të Korçës këtë të mërkurë për drejtim mjeti pa leje drejtimi si dhe pa targa.Gjithashtu, nga policia mësohet se 3 persona të tjerë janë proceduar penalisht, të cilët akuzohen për vepra të ndryshme penale si aksident, kanosje si dhe shpërdorim i tokës.
NJOFTIMI I POLICISË:
DVP Korçë/Vihet në pranga 1 shtetas dhe procedohen në gjendje të lirë 3 të tjerë, për vepra të ndryshme penale. Specialistët e Trafikut Urban dhe Interurban të DVP Korçë arrestuan në flagrancë shtetasin A. Xh., 19 vjeç, banues në fshatin Gështenjas, Pogradec, për veprën penale “Drejtimi i automjeteve në mënyrë të parregullt”, pasi në aksin rrugor Pogradec-Korçë, në afërsi të fshatit Buçimas, Pogradec, u kap duke drejtuar motomjetin tip “Skygo”, pa targa, pa leje drejtimi.
—
Specialistët për Hetimin e Krimeve të Komisariatit të Policisë Korçë referuan materialet në Prokurori dhe filloi procedimi penal në gjendje të lirë për shtetasin Xh. Xh., 25 vjeç, banues në fshatin Drenovë, Korçë, për veprën penale “Kanosja”, pasi për motive të dobëta, dyshohet se ka kanosur me sende të forta, një shtetas të mitur. Po këta specialistë referuan materialet në Prokurori dhe filloi procedimi penal në gjendje të lirë për shtetasin R. L., 54 vjeç, banues në fshatin Barç, Korçë, pasi gjatë kontrollit të ushtruar pranë banesës së këtij shtetasi, u gjetën thasë të mbushur me pleh (torfë), sasi të cilën 54-vjeçari dyshohet se e kishte nxjerrë tek ish-këneta e Maliqit, duke shpërdoruar tokën dhe e tregëtonte në mënyrë të paligjshme, i paregjistruar në organet tatimore.
—
Specialistët për Hetimin e Krimeve të Komisariatit të Policisë Pogradec referuan materialet në Prokurori dhe filloi procedimi penal në gjendje të lirë për shtetasin E. C., 27 vjeç, banues në fshatin Barç, Korçë, për veprën penale “Shpërdorimi i tokës”, pasi në dalje të qytetit të Pogradecit, u kap duke transportuar me automjetin furgon tip “Benz”, sasi me torfë e cila dyshohet të jetë nxjerrë në mënyrë të paligjshme në fushën e Maliqit. Materialet i kaluan Prokurorisë pranë Gjykatës së Shkallës së Parë Korçë, për veprime të mëtejshme.
—
Korçë/Informacion paraprak Më datë 22.02.2023, rreth orës 13:00, në lagjen nr. 1, në bulevard “Republika”, automjeti tip “BMë” me drejtues shtetasin M. D., ka aksidentuar këmbësoren N. K., 69 vjeçe, banuese në Korçë, e cila ndodhet jashtë rrezikut për jetën. Me drejtuesin e mjetit po kryen veprimet e mëtejshme procedurale. Grupi hetimor po punon për përcaktimin e shkaqeve të aksidentit.
