DURRËS– Banorët e zonës së Spitallës në qytetin e Durrësit janë ngritur këtë të enjte në protestë për shkak të rrugës kryesore që ndahet me trafikndarëse, e cila përshkon një distancë të gjatë, sipas këtyre të fundit, kjo iu ka sjellë vështirësi në lëvizjen e përditshme si dhe iu ka dëmtuar punën bizneseve në zonë.
Banorët e Spitallës i janë drejtuar me një kërkesë Bashkisë së Durrësit, që t’u lihen dy pika daljesh që të kenë mundësi kalimi nga krahu tjetër i rrugës.
“I jemi drejtuar bashkisë së Durrësit me një kërkesë për dy pika daljesh, një tek nënstacioni dhe tjetra tek pjesa e urës, që të kemi mundësi kalimi në krahun tjetër të rrugës. Nga kryetarja e bashkisë na është thënë që do ua lëmë këtë segment. Ndërsa nga firma ndërtuese na thuhet që do vendosim bordura dhe nuk do keni mundësi kalimi në krahun tjetër. Na ka dëmtuar punën, distanca është shumë e gjatë dhe nuk mund të kalojmë në krahun tjetër. Kjo zonë është e gjitha me biznese, mbi 200 të tilla dhe rruga na e ka vështirësuar punën”, shprehet njëri nga banorët
Ndërsa një tjetër banorë shpreh shqetësimin e tij, duke thënë se prej kohësh nuk punon, për shkak të trafikndarëses
“U bë shumë kohë që s’po punojmë. U prish rruga, na premtuan që do ta rregullojnë, por u bë më keq. Duke vënë këtë trafikndarësen në mes, ne s’po punojmë më”, tha ai.
