DIMAL- Një vjedhje ka ndodhur në fshatin Goriçan të Dimalit, ku bëhet me dije se disa persona të paidentifikuar kanë hyrë në banesën e një 64-vjeçari me iniciale P.Xh dhe i kanë vjedhur 1.5 milionë lekë. Ndërkohë ende nuk është mësuar se si ata kishin siguruar çelsat e banesës ku morën lekët si dhe 2 telefona.
NJOFTIMI I POLICISË:
Gjatë natës, në fshatin Goriçan, Dimal, dyshohet se shtetas ende të paidentifikuar, të cilët kishin siguruar çelësin e derës së banesës së shtetasit P. Xh., 64 vjeç, kanë hyrë në këtë banesë, duke hapur derën me çelës, dhe kanë marrë rreth 150 000 lekë të rinj, telefonat e të zotëve të banesës dhe janë larguar.
Menjëherë pas njoftimit për këtë rast, shërbimet e Policisë kanë shkuar në vendin e ngjarjes. Grupi hetimor, nën drejtimin e Prokurorisë, po punon intensivisht për zbardhjen dhe dokumentimin e plotë të rrethanave të ngjarjes dhe identifikimin e autorëve. Vijojnë kontrollet në terren dhe në ambiente të ndryshme, me qëllim kapjen e autorëve dhe vënien e tyre përpara përgjegjësisë penale.
