TIRANË- Kreu i Partisë së Lirisë Ilir Meta i ftuar në emisionin “Të Pa Ekspozuarit” nga Ylli Rakipi, ka treguar më shumë detaje mbi arsyen se pse u thirr tek Prokuroria e Posaçme (SPAK). Ai deklaroi se nuk ka asnjë lidhje me çështjen CEZ DIA për të cilen ai ishte thirrur.
META: Sa herë të më thërrasë SPAK do shkoj. SPAK krenohet sot me denoncimet dhe kallëzimet e mia dhe të Partisë së Lirisë. Mendova se isha thirrur në cilësinë e kallëzuesit për disa nga aferat e rënda që kam kallëzuar. Sa i përket cështjes për të cilën u thirra, kam zero shqetësim sepse s’kam asnjë lidhje. Kjo cështje CEZ DIA nuk ka asnjë lidhje me Ilir Metën sepse kur është lidhur kjo marrëveshje nuk kam qenë unë ministër. U thirra thjesht si deklarues. Nuk ka dhe nuk mund të ketë asnjë shkresë dhe asnjë dokument që Ilir Meta të ketë cënuar një interes publik. Zero. Drejtësia nuk duhet të bëjë gabimin që bëri një gjykatës. Të cilit i premtuan që do ta bënin kryetar të Gjykatës Kushtetuese. E përdori, e përdhosi për të shkelur dinjitetin e Gjykatës Kushtetuese.
