TIRANË– Kreu i Partisë Demokratike Sali Berisha në konferencën e përjavshme me gazetarët në selinë qëndrore të PD-së, i është rikthyer çështjes së McGonigal, ku këtë radhë është shprehur se ekipi i McGonigal, Dorian Duçka dhe Agron Neza, kalonin nga një lokal në tjetër, nga një hotel në tjetër, duke bërë gjahun e biznesmenëve për t’u zhvatur atyre miliona euro, ku fakt i ri sipas tij është që këta të fundit i kanë kërkuar në maj të vitit 2022, miliona për ta hequr nga lista e zezë, sipërmarrësit dhe biznesmenit të njohur Ylli Ndroqi, i cili njëkohësisht është drejtuesi i rrjetit televiziv, Ora News.
PJESË NGA FJALA E BERISHËS:
“Në takimin tonë para një jave, unë ju informova ju se ekipi i famëziut McGonigal, tradhtarit të kombit amerikan, mafiozët Dorian Duçka dhe Agron Neza, kalonin nga një lokal në tjetër, nga një hotel në tjetër, duke bërë gjahun e biznesmenëve për t’u zhvatur atyre miliona euro.
Njëri nga këta biznesmenë, të cilit i kanë kërkuar në maj të vitit 2022, miliona për ta hequr nga lista e zezë, është sipërmarrësi i njohur, është drejtuesi i rrjetit televiziv, Ora News, Ylli Ndroqi.
Dorian Duçka dhe Agron Neza, këta mafiozë kriminelë dhe të pafytyrë, jo vetëm i kanë kërkuar këtij sipërmarrësi gjobën, por refuzimi i tij në prani të dëshmitarëve, t’ua paguajë atë, është shoqëruar me kërcënime të mëvonshme nga ana e këtyre dy mafiozëve.
Unë e përgëzoj zotin Ylli Ndroqi për qëndrimin që ai ka mbajtur. Këtë denoncim ai e ka bërë edhe zyrtarisht pranë autoriteteve amerikane.”
