ATHINË– Makina e diplomates italiane në Athinë është përfshirë nga flakët e zjarrit. Bëhet fjalë për makinën e Sekretares së Parë të Ambasadës Italiane në Athinë, Susanna Schlein. Mësohet se mjeti është djegur plotësisht dhe se zjarri është vënë teksa mjeti ka qenë i parkuar. Të dhënat paraprake tregojnë se ky ishte një sulm i qëllimshëm dhe se autorët kanë qenë dy persona të maskuar. Policia ende nuk ka dhënë detaje në lidhje me ngjarjen ndërkohë që hetimet ende vazhdojnë.
Si pasojë e flakëve është djegur pjesërisht edhe një makinë tjetër, që ka qenë parkuar afër makinës së diplomates italiane. Në lidhje me ngjarjen ka reaguar ashpër Ministria e Jashtme italiane. Në një postim në Twitter ministri i Jashtëm Antonio Tajani shprehet i indinjuar për sulmin dhe tregon se ka pasur një bisedë telefonike me Schlein ku i ka shprehur solidaritein e tij. Dhe kryeministrja Georgia Melonmi ka reaguar pas sulmit. Ajo shprehet se ky mund të jetë një sulm anarkist ndaj zyrtares së lartë të ambasadës dhe shprehu mbështetjen e saj për Schlein.
