ELBASAN– Një nga dëshmitarët e marrë në pyetje për vrasjen e Pjerin Xhuvanit, është arrestuar këtë të premte jashtë sallës së gjyqit pasi dha dëshmi të rreme para trupit gjykues dhe prokurorit në seancën e zhvilluar ditën e sotme. Më konkretisht, në deklaratën e tij të parë, dëshmitari Miles Kurti, ka thënë tjetër version të ngjarjes krahasuar me atë që ka dhënë sot gjatë seancës gjyqësore. Dëshmitë e tij janë krahasuar dhe me pamjet që prokuroria ka poseduar nga vendi i ngjarjes dhe nuk përputhej.
Dyshimi është se deklaratat e tij kontradiktore kanë qenë të qëllimshme dhe kanë synuar pengimin e hetimeve nga gjykata, ndaj është vendosur dhe masa e arrestit për të.
Më 21 prill 2021, 4 ditë para zgjedhjeve parlamentare të 25 prillit, në Elbasan u vra Pjerin Xhuvani, përkrahës i Partisë Socialiste. Paplekaj ishte pjesë e një “SMV”, strukture për Mbrojtjen e Votës e ngritur në Elbasan nga PD. Pas një sherri verbal pasi SMV dyshonte se Xhuvani ishte pjesë e një grupi që blinin vota, ndodhi vrasja ku mbeti i pajetë Xhuvani dhe u plagosën 4 persona të tjerë.
