BRITANI– Gjykata e Luton ka dënuar katër shqiptarë të cilët u kapën në një shtëpi bari në muajin gusht të këtij viti. Sipas “The Telegraph”, një prej shqiptarëve ka dëshmuar përpara gjykatës se “është më mirë që të futet në burg, se sa Shqipëria”. Katër shqiptarët, konkretisht: Runi Firaku, Drillon Sulaj, Andi Zyberaj dhe Ermir Zyberaj u kapën në një shtëpi bari në zonën e Strood në Kent në muajin gusht. Ata u dënuan me nga 7 dhe 8 muaj burg.
Gjatë aksionit, policia gjeti dhe sekuestroi 347 rrënjë kanabisi si dhe një sasi tjetër lënde narkotike gati për shitje. Droga kapte vlerën e 250 mijë paundëve. Firaku, 43 vjeç u rekrutua menjëherë në “shtëpinë e barit” nga bandat e trafikantëve, vetëm pak ditë pasi mbërriti ilegalisht në Mbretërinë e Bashkuar.
SHQIPTARËT NË BORXH NDAJ GRUPIT TË TRAFIKANTËVE
Në dëshminë e tyre, shqiptarët kanë treguar se janë në borxh ndaj grupeve kriminale që i kishin rekrutuar në shtëpinë e barit. Sulaj, 32 vjeç tha se është kërcënuar për të shlyer një borxh prej 20 mijë paundësh, pasi u kishte kërkuar atyre ta fusnin ilegalisht në Mbretërinë e Bashkuar.
Andi Zyberaj, 35 vjeç dhe Ermir Zyberaj, 32, të cilët nuk kanë lidhje me njëri-tjetrin, ishin kontrabanduar gjithashtu në MB njëri në pjesën e pasme të një furgoni dhe tjetri me kamion dhe jetonin në Luton. Gjykata tha se Ermir Zyberaj po shlyente një borxh prej 50 mijë eurosh, por nuk u tha nëse kjo ka të bëjë edhe me kontrabandën e njerëzve.
