DURRËS– Një 43-vjeçar ëshrë vënë në pranga nga Forcat Shqiponja në një lokal në Durrës pas informacioneve të marra se mbante një armë zjarri të llojit pistoletë pa leje në brez. Sherif Çela nuk është një emër i panjohur për Policinë pasi rezulton person me precedentë penal pasi më parë është akuzuar për tentativë vrasjeje!
NJOFTIMI I POLICISË:
Finalizohet operacioni policor i koduar “Klienti”, i zhvilluar nga Forca e Posaçme “Shqiponja” dhe Komisariati i Policisë Durrës. Me armë zjarri pistoletë me vete, në ambientet e një lokali, kapet në flagrancë dhe vihet në pranga 43-vjeçari. Shërbimet e Policisë së Durrësit, si rezultat i punës së pandërprerë monitoruese dhe vëzhguese, ndaj shtetasve me precedent të mëparshëm kriminal, mbështetur dhe nga inteligjenca informative, kanë organizuar dhe finalizuar operacionin policor të koduar “Klienti”. Si rezultat i këtij operacioni, u kap në flagrancë dhe u arrestua shtetasi Sherif Çela (Ismailaj), 43 vjeç, banues në lagjen Nr. 2, Durrës, për veprën penale “Mbajtja pa leje e armëve, armëve shpërthyese dhe i municionit”. 43-vjeçari, me precedent të mëparshëm kriminal, për tentativë vrasjeje dhe armëmbajtje pa leje. Gjatë kontrollit fizik të ushtruar ndaj shtetasit Sherif Çela (Ismailaj), i cili në momentin e arrestimit ndodhej në ambientet e një lokali, shërbimet e Policisë i gjetën dhe i sekuestruan në cilësinë e provës materiale, 1 armë zjarri pistoletë, 1 krehër pistolete dhe municion luftarak. Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme.
