Depozitat kanë arritur një nivel të ri rekord në janar të këtij viti, sipas statistikave të publikuara nga banka e Shqipërisë.
Stoku i kursimeve që individët, familjet, bizneset jo publike e publike, institucionet financiare dhe ato shtetërore mbajnë në banka arritën për herë të parë në kufirin e 1.3 milionë lekëve, ose rreth 11 miliardë euro.
Ndikimin kryesor në rritjen e kursimeve e dhanë depozitat në valutë, duke reflektuar dhe pasojat sezonale, si rrjedhojë e prurjeve të emigrantëve për festat e fund vitit, por dhe nënçmimin e euros ndaj lekut, pasi të dhënat e Bankës së Shqipërisë raportohen në lekë.
Sipas BSH, në banka ka gjithsej 745 miliardë lekë kursime në valutë, ose 57.27% e totalit.
Që prej vitit 2015, valuta, kryesisht euro, është bërë monedha më e preferuar për të kursyer dhe pesha e kursimeve në monedhë të huaj po rritet vazhdimisht, pavarësisht përpjekjeve të bankës së Shqipërisë për të ulur nivelin e euroizimit në ekonomi.
Në janar, depozitat në total u rritën me 1.85% në krahasim me dhjetorin 2022. Rreth 81% e rritjes erdhi nga valuta. Kursimet në monedhë të huaj u zgjeruan me gati 3% për të njëjtën periudhë, të ndikuara kryesisht nga individët.
Me bazë vjetore (janar 2023/janar 2022), depozitat totale në sistem u zgjeruan me 5.4%. Gjithsesi, ritmet e rritjes janë ngadalësuar ndjeshëm, teksa një viti më parë zgjerimi ishte mbi 10%.
Në këtë ngadalësim ka ndikuar kryesisht ecuria e kursimeve në lekë, duke reflektuar si një pamundësi për të lënë para mënjanë nga rritja e çmimeve dhe një tendencë të zhvendosjes drejt alternativave me kthim më të lartë, si letrat me vlerë të qeverisë./Monitor
